Lögreglumenn sem fóru um borð í grænlenska fiskiskipið Polar Nanoq u.þ.b. 90 mílur suðvestur af landinu hafa rætt við mennina tvo sem voru handteknir í áhöfn þess. Var þeim kynnt sakarefni og boðið að tjá sig, en lítið fékkst þó upp úr því. Þetta segir Grímur Grímsson, yfirlögregluþjónn hjá lögreglunni á höfuðborgarsvæðinu, í samtali við mbl.is.
Segir hann að mennirnir verði yfirheyrðir við komuna til landsins seinna í kvöld. Staðsetning þess hvar þeir verða yfirheyrðir er þó enn óákveðin. Grímur segir að mennirnir, sem eru grænlenskir ríkisborgarar, muni eiga rétt á túlki.
Aðspurður hvort þeir séu grunaðir um saknæmt athæfi segir Grímur að þeir séu ekki með réttarstöðu grunaðra, en í kjölfar yfirheyrslna verði tekin ákvörðun um framhaldið.
Aðrir í áhöfn skipsins eru frjálsir ferða sinna og hafa þeir ekki fengið nein fyrirmæli um að halda kyrru fyrir. Spurður hvort mennirnir tveir séu í járnum segist Grímur ekki geta svarað því, en að búið sé að skilja þá frá öðrum í áhöfninni.