Þrír snjóflóðaleitarhundar eru notaðir við leitina að Birnu Brjánsdóttur eða vísbendingum tengdum hvarfi hennar meðfram vegum á Strandarheiði.
Farið er um svæðið í þremur hópum. Verið er að gá hvort hundarnir marka einhverja lykt.
Að sögn Guðbrands Arnar Arnarsonar, stjórnanda hjá björgunarsveitunum, verður leitað fram eftir kvöldi á svæðinu en leitarhópar voru kallaðir út um eittleytið í dag.
Hann segir að verið sé að tví- og þríleita á ákveðnum svæðum í Hafnarfirðinum. Alls eru 43 björgunarsveitarmenn að störfum bæði á Strandarheiði og í Hafnarfirði.
„Það er verið að fylgja eftir þeim vísbendingum sem hafa komið síðustu daga," segir Guðbrandur Arnar.
Frétt mbl.is: Leita vegna vísbendingar við Kúagerði