Farið verður fram á gæsluvarðhald yfir skipverjum af grænlenska togaranum Polar Nanoq sem handteknir voru um borð í skipinu í gær. Farið verður fram á gæsluvarðhald yfir að minnsta kosti tveimur þeirra. Mennirnir eru grunaðir um að búa yfir upplýsingum um hvarf Birnu Brjánsdóttur.
Ekkert hefur spurst til Birnu frá því kl. 5:25 að morgni laugardags eða í meira en 125 klukkustundir.
Leiða þarf tvo hinna handteknu fyrir dómara í síðasta lagi um hádegi í dag. Þá verður sólarhringur liðinn frá því að þeir voru handteknir.
Þriðji maðurinn var handtekinn síðdegis í gær.
Mennirnir eru allir Grænlendingar. Þeir hafa réttarstöðu grunaðra manna þar sem þeir eru grunaðir um að búa yfir upplýsingum er tengjast hvarfi Birnu.
Hér að neðan er farið yfir atburðarásina frá föstudagsmorgni til dagsins í dag, eins og henni hefur verið lýst í fjölmiðlum.
Föstudagur 13. janúar:
Birna Brjánsdóttir kvaddi föður sinn, sem hún býr með í Breiðholti, á föstudagsmorgun eins og venjulega. Um kvöldið fór hún ásamt vinkonu sinni í miðbæ Reykjavíkur. Þær spiluðu á Nora Magasin og fóru svo á skemmtistaðinn Húrra við Tryggvagötu til að dansa. Birna sást síðast á eftirlitsmyndavél við Laugaveg, undir morgun á laugardag.
Vinkonurnar voru saman á Húrra til kl. 2 um nóttina eða þar til Matthildur ákvað að fara heim. Birna varð eftir á staðnum ásamt sameiginlegri vinkonu þeirra.
Um kl. 5 fór hún ein síns liðs út af Húrra. Birna sést svo í eftirlitsmyndavélum ganga ein austur Austurstræti, Bankastræti, Skólavörðustíg, Smiðjustíg og inn á Laugaveg þar sem hún hverfur sjónum um kl. 05:25.
Á myndum úr eftirlitsmyndavélum má sjá rauða fólksbifreið, sem sennilega er af gerðinni Kia Rio, ekið vestur Laugaveg á móts við hús nr. 31 kl. 05:25, á sama tíma og Birna var þar á ferð. Lögreglan lýsti strax eftir ökumönnum bílsins en það hefur enn engan árangur borið.
Þegar Birna var stödd við Klapparstíg var sími hennar tengdur við símamastur í húsnæði Máls og menningar við Laugaveg. Stuttu síðar tengdist hann við mastur við Lindargötu. Það er talið benda til þess að hún hafi ekki gengið áfram upp Laugaveg heldur beygt niður á Hverfisgötu. Þar eru færri eftirlitsmyndavélar. Skömmu síðar tengdist síminn við mastur á gamla Landsbankahúsinu á horni Barónsstígs og Laugavegar. Nokkrum mínútum síðar tengdist hann svo við símamastur við Listaháskólann á horni Sæbrautar og Laugarnesvegar. Út frá þessum gögnum, sem Fréttablaðið vísar til, er talið að þá hafi Birna verið komin í ökutæki á ferð.
Síðasta merki frá síma hennar var numið í mastri við Flatahraun í Hafnarfirði. Það var um klukkan sex að morgni laugardags.
Í kjölfarið er slökkt handvirkt á símanum.
Nokkrum mínútum áður sást rauður Kia Rio-bíll á eftirlitsmyndavélum við áhaldahús Golfklúbbs Kópavogs og Garðabæjar. Milli kl. 6 og 6:30 sést slíkum bíl svo ekið að togaranum PolarNanoq við Hafnarfjarðarhöfn, aðeins örfáum mínútum eftir að slökkt er á síma Birnu.
Birna mætti ekki til vinnu í Hagkaup í Kringlunni að morgni laugardagsins. Var þá haft samband við foreldra hennar sem höfðu svo samband við lögregluna. Lögreglan lýsti eftir Birnu seint um kvöldið.
Um kl. 21 leysti grænlenski togarinn Polar Nanoq landfestar í Hafnarfjarðarhöfn og sigldi áleiðis til Grænlands. Á þeirri stundu var ekkert vitað um möguleg tengsl hans við hvarfið.
Sjálfboðaliðar, m.a. vinir og ættingjar Birnu, hófu strax leit það kvöld og um nóttina og allan næsta dag. Opnuð var Facebook-síða þar sem fólk deildi því hvar það væri að leita. Fólk leitaði í miðbæ Reykjavíkur, í Hafnarfirði og víðar.
Á mánudagsmorgun fékk lögreglan aðstoð sérþjálfaðra björgunarsveitarmanna við leitina að Birnu. Leitað var meðal annars í 300 metra radíus frá staðnum á Laugavegi þar sem hún sást síðast á eftirlitsmyndavélum.
Seint um kvöldið fundu svo sjálfboðaliðar sem voru við leit skópar við birgðastöð Atlantsolíu við Hafnarfjarðarhöfn. Staðfest er að Birna á skóna. Ítarleg leit var gerð á svæðinu um nóttina en án árangurs.
Björgunarsveitarmenn héldu áfram leitinni að Birnu, m.a. í Hafnarfirði. Lögreglan lagði hald á bíl, rauðan Kia-Rio í Kópavogi. Rannsókn á bílnum, sem er bílaleigubíll, stendur enn yfir. Fram hefur komið að bíllinn sé mögulega sá sem skipverjar á Polar Nanoq höfðu á leigu um helgina, sá hinn sami og sást á Laugavegi og einnig hugsanlega sá sami og sást á eftirlitsmyndavél við golfskálann.
Síðdegis fékk mbl.is staðfest að skipverjar á Polar Nanoq væru mögulega viðriðnir hvarf hennar þar sem sést hefði til þeirra aka á rauðum bíl að skipinu, eins og fyrr segir.
Um kvöldið var svo ljóst að lögreglan væri búin að óska eftir aðstoð dansks varðskips, Triton, við aðgerð sem miðaði að því að stöðva för Polar Nanoq og koma því aftur til hafnar á Íslandi. Fjórir rannsóknarlögreglumenn voru fluttir með þyrlu Landhelgisgæslunnar um borð í Triton en þegar aðgerðin hófst var Polar Nanoq komið nálægt strönd Grænlands.
Áhöfnin var samvinnuþýð og sneri skipstjórinn skipinu til Íslands. Hluta leiðarinnar sigldi það í samfloti við Triton.
Lögreglumenn í sérsveit ríkislögreglustjóra fóru um borð í skipið úr þyrlu Landhelgisgæslunnar, TF-LIF um hádegið. Þeir tóku yfir stjórn skipsins og var því svo siglt áleiðis til Hafnarfjarðar.
Þeir handtóku tvo menn um borð. Skipið var þá statt um það bil 90 mílur suðvestur af landinu.
Ástæða aðgerðar lögreglu var sú að við rannsókn lögreglu á hvarfi Birnu höfðu vaknað grunsemdir um að hinir handteknu hefðu upplýsingar um hvarf hennar.
Mestallan daginn leituðu björgunarsveitarmenn í Hafnarfjarðarhöfn og á Strandarheiði. Sú leit bar engan árangur.
Eftir komu skipsins til hafnar, um kl. 23 í gærkvöldi, voru mennirnir þrír fluttir á lögreglustöðina við Hverfisgötu þar sem þeir voru yfirheyrðir í alla nótt. Yfirheyrslunum lauk um kl. 8 í morgun.
Í dag verður farið fram á gæsluvarðhald yfir þeim, að minnsta kosti tveimur.
Uppfært kl. 14.24: Búið er að úrskurða tvo menn af skipinu í tveggja vikna gæsluvarðhald. Þeir neita báðir sök.