Maðurinn sem stal bifreið með tveggja ára barni fyrir utan leikskóla í Kópavogi í ágúst var í gær dæmdur í fimm mánaða fangelsi og sviptur ökuréttindum ævilangt, en hann var undir miklum áhrifum metamfetamíns þegar hann stal bifreiðinni.
Frétt mbl.is: Barn í bifreið sem var stolið
Auk þessa brots var maðurinn, sem er 28 ára gamall, dæmdur fyrir fleiri brot, en í desember 2015 var hann stöðvaður undir stýri, sviptur ökurétti og óhæfur til að stjórna bifreiðinni örugglega vegna áhrifa ávana- og fíkniefna (amfetamín í blóði mældist 130 ng/ml og morfín 25 ng/ml).
Mikla athygli vakti þegar maðurinn stal bifreiðinni við leikskólann að Rjúpnasölum í Kópavogi. Faðir barnsins hafði skilið bílinn eftir í gangi á meðan hann sótti eldra barn sitt á leikskólann. Bílinn fannst skömmu síðar við verslun Krónunnar í Kórahverfi. Þyrla Landhelgisgæslunnar var meðal annars kölluð út til að aðstoða við leitina.
Maðurinn játaði skýlaust brot sín og var sakfelldur fyrir að aka í tvígang óhæfur til að stjórna bifreið örugglega vegna áhrifa ávana- og fíkniefna og fyrir að aka alls þrisvar sinnum sviptur ökurétti. Þá var hann sakfelldur fyrir nytjastuld.