Friðrik Sigurðsson rekstrarráðgjafi, sem starfar nú tímabundið fyrir norsku hagsmunasamtökin í laxeldi, Sjömat Norge, segir að togstreita geti orðið á milli Noregs og Íslands ef íslensk stjórnvöld hafni því að innleiða regluverk Evrópusambandsins um lífræna ræktun.
„Ef íslensk stjórnvöld hafna því að innleiða reglugerðina getur skapast mikil togstreita á milli Noregs og Íslands, vegna þess að Noregur fær þá ekki að flytja lífrænan lax inn til ESB. Þetta er því pólitískt heitt og erfitt mál,“ segir Friðrik meðal annars í umfjöllun um mál þetta í Morgunblaðinu í dag.
Í janúarlok er væntanleg hingað til lands sendinefnd hagsmunasamtaka til þess að eiga viðræður við fulltrúa landbúnaðarráðneytisins og landbúnaðarráðherra um innleiðingu reglna Evrópusambandsins á Íslandi um lífræna ræktun, sem er krafa ESB. Friðrik kemur með sendinefndinni.