Umfangsmiklar aðgerðir voru af hálfu lögreglunnar á höfuðborgarsvæðinu við Selvogsvita í Selvogi síðdegis í dag. Vitinn er skammt austan við húsaþyrpinguna í Selvogi í átt að Þorlákshöfn. Er svæðið meðal þeirra staða þar sem björgunarsveitir hafa leitað Birnu Brjánsdóttur í dag.
Björgunarsveitarbílar eru nú á leið að Gryfjunni fyrir neðan Þorlákshöfn þar hefur þyrla Landhelgisgæslunnar einnig farið yfir fyrr í dag. Gryfjan er svæði þar sem að sótt hefur verið efni í hafnarframkvæmdir í Þorlákshöfn.
Björgunarsveitir voru á fjórða tímanum í dag kallaðar í hús aftur og átti að endurskipuleggja leitina vegna nýrra vísbendinga sem bárust um málið.
Aðgerðum lögreglu á svæðinu er að mestu lokið núna en stjórnstöðvabíll björgunarsveitarinnar er í Selvogi.
Mikill viðbúnaður björgunarsveita og lögreglumanna er nú við Óseyrarbrú við Ölfusárósa.
Fréttin er uppfærð