Ljósleiðari hríslast út um sveitir Rangárþings ytra, út frá Hellu, allt upp að Heklurótum og niður að sjó í Þykkvabæ, frá Þjórsá og út að Eystri-Rangá.
Farið er að sjást fyrir endann á lagningu leiðarans og verða fyrstu heimilin tengd um næstu mánaðamót, að því er fram kemur í Morgunblaðinu í dag.
„Fólk mun njóta fjarskipta eins og þau gerast best á Íslandi í dag í stað þess að hafa aðgang að stopulu netsambandi og sjónvarpi. Kerfið er opið. Fólk getur valið þær þjónustuveitur sem það kýs að versla við. Það verður því raunveruleg samkeppni um fjarskiptin,“ segir Guðmundur Daníelsson, verkefnastjóri Rangárljóss sem stendur fyrir lagningu og rekstri ljósleiðarans. Áhrifin verða mismunandi.