Að minnsta kosti þrír ráðherrar grænlensku ríkisstjórnarinnar tóku þátt í samstöðuathöfn í Nuuk í gærkvöldi, sem haldin var í minningu Birnu Brjánsdóttur. Samkvæmt upplýsingum frá ráðuneyti utanríkismála var fjölmennt við athöfnina en þar kveiktu viðstaddir á kertum, lögðu blóm og sungu sálma.
Frétt mbl.is: Hundruð manna tendruðu kerti í Nuuk
Meðal viðstaddra voru Vittus Qujaukitsoq, ráðherra utanríkismála, iðnaðar-, atvinnu-, viðskipta- og orkumála, Mute Bourup Egade, ráðherra orkumála- og Martha Lund Olsen, ráðherra húsnæðis- og byggingarmála og innviða. Þá sagði forseti grænlenska þingsins nokkur orð við athöfnina.
Í samtali við mbl.is sagði fulltrúi utanríkisráðuneytisins líklegt að fleiri embættismenn hefðu tekið þátt í athöfninni en þar sem um einkaframtak hefði verið að ræða hefðu þeir verið í fylgd með fjölskyldu sinni eða vinum og ekki á staðnum í opinberum tilgangi.