Sjö voru fluttir á slysadeild Landspítalans eftir umferðarslysið sem varð á Biskupstungnabraut við afleggjarann að Búrfellsvegi, laust fyrir klukkan 15.
Frétt mbl.is: Árekstur á Biskupstungnabraut
Einn hinna sjö er nokkuð slasaður, að sögn lögreglunnar á Suðurlandi, sem segir að fólkið sé í mismunandi ástandi.
Tveir jeppar lentu í árekstri við afleggjarann. Ökumaður þriðja bílsins, sem var einn í bílnum, kom þá aðvífandi en tókst að aka út af til að afstýra stærra slysi.
Lögreglan lokaði Biskupstungnabraut vegna slyssins en verið er að klára vinnu á vettvangi og verður vegurinn opnaður innan skamms.
Frétt mbl.is: Einn yfir nótt vegna bílslyss