Starfsemi Klíníkinnar er ekki hægt að kalla neitt annað en einkarekið sjúkrahús. Þetta sagði Katrín Jakobsdóttir, formaður Vinstri grænna, á alþingi í dag.
Sagði hún að undanfarið hefði verið til umræðu umsókn einkaaðila, um að fá samning við Sjúkratryggingar Íslands til að opna nýja starfsemi, sem feli í sér sérhæfðar skurðaðgerðir og legudeild til allt að fimm daga.
Frétt mbl.is: Deilt um einkarekin sjúkrahús
„Þetta er ekki hægt að kalla neitt annað en einkarekið sjúkrahús, enda líta bæði landlæknir og einkaaðilinn, Klíníkin sjálf, á starfsemina sem sérhæfða sjúkrahúsþjónustu,“ sagði Katrín.
„Ef starfsemin verður skilgreind með þeim hætti, kallar það á að ráðherra þurfi að taka ákvörðun um hvort veita eigi starfseminni starfsleyfi.“
Risastóra ákvörðun sagði hún hvíla hjá ráðherra, sem gæti haft óafturkræf áhrif á íslenskt heilbrigðiskerfi, og væri um leið grundvallarstefnubreyting í heilbrigðisþjónustu hér á landi.
„Það er ólíku saman að jafna, stofurekstri sjálfstætt starfandi sérfræðilækna, einyrkjastarfsemi, og því sem hér er á döfinni.“
Ef ákveðið væri að semja um þessa starfsemi, væri þá verið að færa fé frá hinu opinbera og yfir til einkaaðila, því ekki liggi fyrir að bæta eigi neinu fé inn í heilbrigðiskerfið.
Sagði hún það óskynsamlegt að dreifa kröftum og fjármunum með þessum hætti, á sama tíma og kannanir sýndu að mikill meirihluti landsmanna vildi áfram að heilbrigðisþjónusta væri á vegum hins opinbera.
Að lokum sagðist hún vilja heyra heilbrigðisráðherra, Óttarr Proppé, taka afdráttarlausa afstöðu gegn þessum áformum, um einkarekið sjúkrahús.
Óttarr sagði mikilvægt að minna á að stofan hefði starfað um nokkurt skeið, og væri á borð við aðrar starfsstöðvar sérfræðinga. Ekki hefði þá verið tekin ákvörðun um hvort veita ætti leyfi fyrir starfseminni.
Óttarr tók einnig undir orð Katrínar, um að mótuð skyldi heildstæð stefna í heilbrigðismálum hér á landi.
Þá sagði hann ekki standa til að gera grundvallarbreytingar á heilbrigðiskerfinu. Fyrst myndi hann vilja móta heildstæða stefnu í þessum efnum.