Mikil umræða hefur skapast um einkarekna sjúkraþjónustu síðustu vikur eða frá því að landlæknir staðfesti að fyrirhugaður rekstur Klíníkurinnar Ármúla á fimm daga legudeild uppfyllti faglegar kröfur embættisins.
Katrín Jakobsdóttir, formaður Vinstri hreyfingarinnar – græns framboðs, sagði á Alþingi í dag að ekki væri hægt að kalla starfsemi Klíníkurinnar annað en einkarekið sjúkrahús og að risastór ákvörðun hvíldi hjá ráðherra sem gæti haft óafturkræf áhrif á íslenskt heilbrigðiskerfi.
Frétt mbl.is: „Ekki neitt annað en einkarekið sjúkrahús“
Þingflokkur Samfylkingarinnar hefur nú sent frá sér ályktun þar sem hann skorar á Óttar Proppé heilbrigðisráðherra að samþykkja ekki einkarekna sjúkrahúsþjónustu.
Þingmenn Samfylkingarinnar hafa jafnframt lagt fram frumvarp sem kveður á um að heilbrigðisráðherra þurfi að fá samþykkt Alþingis til að semja um aukinn einkarekstur eða einkavæðingu.
„Það er mikilvægt að þingmenn sameinist um afgreiðslu málsins. Slíkar stefnumarkandi ákvarðanir eiga heima á Alþingi en ekki bak við luktar dyr.“
Í ályktuninni segir að umsókn um leyfi til að starfrækja sérhæft sjúkrahús í einkarekstri sé á borði ráðherrans. Þingflokkur Samfylkingarinnar tekur í sama streng og Katrín og segir að samþykkt ráðherra fæli í sér grundvallarbreytingu á íslenska heilbrigðiskerfinu.
Þingflokkur Samfylkingarinnar segir umsóknina snúa að starfsemi sem opinberu spítalarnir séu í fullum færum til að framkvæmda og að kostnaður við samþykki myndi fela í sér „mikið óhagræði, veikari sérfræðiþjónustu og flutning á fjármagni frá fjárþurfa opinberu kerfi í hagnaðardrifinn einkarekstur.“
Í tilkynningunni vekur þingflokkur Samfylkingarinnar einnig athygli á að forstjóri Landspítalans og BSRB hafi opinberlega lagst gegn áformunum.