200 mílur | mbl | 10.2.2017 | 19:05 | Uppfært 19:39

Efast um að skýrslan sé liður í lausn deilunnar

Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi. mbl.is/Ófeigur Lýðsson

„Það var svo sem ekkert sem kom á óvart í þessu,“ segir Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi, en í dag kynnti Þorgerður Katrín Gunnarsdóttir, sjávarútvegs- og landbúnaðarráðherra, skýrslu sem hefur að geyma mat á þjóðhagslegum kostnaði af yfirstandandi verkfalli sjómanna.

Frétt af mbl.is

„Þeirra er ábyrgðin“

Heiðrún segir enga lausn vera í sjónmáli í kjaradeiluunni en allar upplýsingar um áhrif verkfallsins séu þó vissulega af hinu góða. „En hvort að þetta geti orðið einhver liður í lausn deilunnar, ég hef efasemdir um það,“ segir Heiðrún um birtingu skýrslunnar.

Greiningin á efnahagslegum áhrifum verkfallsins sem birt er í skýrslunni miðast við að aflaheimildir megi nýta síðar og að nú eigi sér fyrst og fremst stað tafir á nýtingu aflaheimilda. „Því fer þó fjarri að allt tap og beinn kostnaður sem hlýst af töfum á nýtingu aflaheimilda megi vinna upp síðar alls staðar í flóknum virðiskeðjum sjávarafurða og í hagkerfinu öllu,“ segir meðal annars í niðurstöðum skýrslunnar.

Í því samhengi má nefna að samkvæmt skýrslunni mun þjóðarbúið verða af tekjum sem líklega verða taldar í þúsundum milljóna króna, standi verkfallið fram á loðnuvertíðina og veiðar falla niður.

„Ef það yrði gefinn út aukinn loðnukvóti þá gæti það haft veruleg áhrif ef verkfallið er enn yfirstandandi. Því að loðnan yrði þá ekki veidd síðar, hún er bara veidd hér upp úr miðjum febrúar og eitthvað inn í mars,“ segir Heiðrún. Enn séu þó margir óvissuþættir og meðal annars um það hvort gefinn verði út aukinn loðnukvóti og þá hvort verkfallið verði enn í gangi. „Það er bara ekki tímabært enn sem komið er alla vega að segja til um það,“ segir Heiðrún. „Þessi kjaradeila verður að hafa sinn gang og við stefnum enn þá að því að ná samningum.“