„Ég hef í sjálfu sér ekki áhyggjur“
Setja bókamerki
Hanna Katrín Friðriksson, þingflokksformaður Viðreisnar, hefur ekki áhyggjur af því þó að tveir þingmenn Sjálfstæðisflokksins segist ekki styðja fyrirhugað frumvarp Þorsteins Víglundssonar, félags- og jafnréttismálaráðherra, um jafnlaunavottun.
„Ég hef í sjálfu sér ekki áhyggjur. Þetta frumvarp og afgreiðsla þess er í stjórnarsáttmála þessara þriggja flokka og ég geng út frá því að þau mál verði kláruð þar,“ segir Hanna Katrín í samtali við mbl.is.
Þorsteinn sagði í samtali við mbl.is fyrr í dag að fjöldi vandaðra rannsókna hefði verið unninn sem sýni að launamunur kynjanna sé fyrir hendi og sé enn fremur mjög mikill.
Brynjar Níelsson, þingmaður Sjálfstæðisflokksins, sem hefur ásamt Óla Birni Kárasyni samflokksmanni sínum lýst því yfir að hann ætli ekki að styðja frumvarp um jafnlaunavottun, hefur sagt að ef fara eigi út í jafnmikið inngrip í rekstur fyrirtækja og frjálsra samninga sé lágmarkið að hafið sé yfir nokkurn vafa að vandamálið sé til staðar.
Hanna Katrín segir að það sé ekki sitt að hafa áhyggjur af þessari afstöðu þingmannanna tveggja. „Ég geng bara út frá því að þingflokkur Sjálfstæðismanna eins og þingflokkur Viðreisnar og mér best vitandi þingflokkur Bjartrar framtíðar virði þennan stjórnarsáttmála og þar með þar sem stendur í honum. Það er engin önnur afstaða sem ég get tekið til þessa máls.“
Spurð hvað verði ef áðurnefndir þingmenn samþykki ekki fyrirhugað frumvarp segist Hanna Katrín ætla að bíða með að tjá sig um slíkar vangaveltur. „Ég ætla að láta það bíða, ég tek þann pól í hæðina núna að þetta verði virt.“
Gerir ráð fyrir 150 samningum í næstu viku
Hæstiréttur staðfestir vanhæfi alls Landsréttar
Ný staða uppi og óvissan meiri
Segjast ekki vera á kaldri slóð
Ofsóttur innan veggja Boeing
Ekki byggt í takt við áform sveitarfélaga
Bjarkey stendur við skammarbréf Svandísar