Maður í mjög annarlegu ástandi veittist að erlendum ferðamanni á BSÍ um hálf sjö leytið í gær. Tók maðurinn tösku ferðamannsins og neitaði að skila henni nema gegn gjaldi.
Þegar ferðamaðurinn neitaði að verða við þeirri ósk tók maðurinn utan um höfuð ferðamannsins og hrinti honum harkalega í jörðina.
Að sögn lögreglu var ástand mannsins þannig að hann gerði sér ekki grein fyrir athæfi sínu og var hann vistaður í fangageymslu lögreglunnar í tengslum við rannsókn málsins.
Maðurinn sem varð fyrir árásinni var ekki með sjáanlega áverka en honum var illt í höfðinu og því ringlaður að sögn lögreglu.
Ölvaður maður var handtekinn á bar í miðborginni um níu leytið í gærkvöldi fyrir að áreita og hóta erlendum ferðamönnum. Maðurinn vildi að ferðamennirnir keyptu handa honum áfenga drykki. Hann var handtekinn og er vistaður í fangageymslu lögreglu þar til hægt verður að ræða við hann.