Innlent | mbl | 17.2.2017 | 12:21 | Uppfært 18:01

Farið fram á allt að 6 ára fangelsi

Bræðurnir eru ákærðir fyrir skotárás í Fellahverfi í ágúst. Myndin er frá aðalmeðferð málsins í janúar. mbl.is/Golli

Aðalmeðferð í skotárásarmálinu í Fellahverfi frá 5. ágúst í fyrra lauk í héraðsdómi í dag. Lögð var fram auka rannsóknarskýrsla lögreglunnar sem dómari hafði óskað eftir á fyrri stigum aðalmeðferðarinnar í janúar auk þess sem eitt vitni var yfirheyrt. Dómari sagðist gera ráð fyrir dómi í málinu fljótlega en lofaði honum þó ekki í næstu viku.

Í málinu er tekist á um atburði fyrir utan söluturninn Leifasjoppu umrætt kvöld, en bræðurnir hafa viðurkennt að hafa báðir hleypt af haglabyssu fyrir utan söluturninn. Þeir segjast þó ekki hafa komið með byssuna á staðinn, heldur hafi hún verið í eigu einstaklinga í öðrum hópi sem hafi ógnað þeim um kvöldið.

Segja hóp manna hafa ógnað sér

Lýstu mennirnir því á fyrri stigum aðalmeðferðarinnar þannig að þeir hefðu verið staddir í Leifasjoppu og fengið símtal frá móður þeirra um að fyrir utan heimili hennar skammt frá sjoppunni hefðu menn verið að leita bræðranna. Þá hefðu þeim borist hótanir með SMS-skilaboðum úr óþekktu númeri. Seinna hefði komið til átaka milli þeirra og manna úr hinum hópnum fyrir utan sjoppuna. Hefði einn mannanna í hinum hópnum sótt afsagaða haglabyssu inn í bíl og gengið í átt að þeim en eldri bróðurnum, Rafal Marek Nabakowski, hefði tekist að afvopna hann.

Yngri bróðirinn, Marcin Wieslaw Nabakowski, hefði þá tekið við byssunni af bróður sínum, en hann er ákærður fyrir að hafa beint haglabyssunni að bifreið á bílastæði við Rjúpnafell og hleypt af skoti af um tíu metra færi sem hæft hafi hurð og hliðarrúðu bílsins með þeim afleiðingum að skemmdir hafi orðið á hurðinni. Hliðarrúðan hafi brotnað og konan, sem var farþegi í framsæti bifreiðarinnar, fengið glerbrot yfir sig og hlotið minni háttar skurði. Í ákæru málsins er hann sagður með þessu hafa stefnt lífi og heilsu fólksins í bifreiðinni í „stórfelldan háska á ófyrirleitinn hátt“.

Dómari óskaði eftir auka rannsóknarskýrslu

Viðurkenndi Rafal að hafa hleypt skoti úr byssunni en það hefði ekki verið af ásettu ráði. Hann hefði haldið byssunni upp í loftið til að hræða fólkið úr hinum hópnum og óvart hleypt af skoti. Marcin viðurkenndi að hafa hleypt af skoti sem fór í bílinn, en hann hefði hins vegar miðað byssunni niður á við og hafi ekki ætlað að hæfa bílinn með skotinu heldur skjóta í jörðina. Hann hefði ekki ætlað að valda nokkrum skaða.

Vegna þess að óljóst var hvernig byssan sem um ræðir í málinu hefði farið úr vörslu skráðs eiganda hennar og í hendur þeirra sem beittu vopninu óskaði dómari eftir því í janúar að lögreglan rannsakaði það atriði sérstaklega og var aðalmeðferð frestað á meðan. Skýrslan var lögð fyrir dóminn í morgun en saksóknari staðfesti við mbl.is að það atriði hefði ekki nema að takmörkuðu leyti upplýsts.

Orðið nógu skrítið þinghald

Í morgun mætti einnig starfsmaður söluturnsins fyrir dóminn, en hann hafði sést horfa út um glugga söluturnsins þegar atburðirnir áttu sér stað. Lítið var hins vegar að græða á framburði hans fyrir dómi í dag og flæktu tungumálaörðuleikar skýrslutökuna yfir honum talsvert. Þurfti dómari nokkrum sinnum að ítreka að þinghald færi fram á íslensku. Sagði hann þinghaldið vera orðið nógu skrítið nú þegar og því þyrfti að halda því á íslensku en ekki öðru tungumáli til að flækja það ekki enn frekar.

Vitnið hafði áður sagt í skýrslutöku hjá lögreglu að hann hefði séð einhverja veitast að Rafal og Marcin auk þess að mikill fjöldi manns hefði verið fyrir utan söluturninn og verið á eftir bræðrunum. Við skýrslutökuna fyrir dómi sagðist hann hins vegar ekki hafa séð neitt og að upplýsingar hans hefðu að mestu komið frá því sem fólk inni í söluturninum hefði sagt þegar atvikið átti sér stað. Hann gaf þó óljóst í skyn að einhverjir hefðu virst vera á eftir þeim bræðrum. Þá ítrekaði hann margoft að hafa ekki heyrt neina skothvelli.

Farið fram á 5-6 ár og 3-4 ár yfir bræðrunum

Málflutningsræður saksóknara og verjenda í málinu höfðu áður farið fram þar sem saksóknari fór fram á 5-6 ára fangelsi yfir Marcin og 3-4 ára fangelsi yfir Rafal. Ítrekaði hann gerðar kröfur.

Áður en dómþingi var slitið vísuðu verjendur í framburð vitnisins sem hafði mætt í dag og sögðu að ljóst væri að bræðrunum hefði stafað hætta af um 40-50 manns sem hefðu verið á eftir þeim og hefðu verið fyrir utan sjoppuna á þessum tíma. Þyrfti að meta viðbrögð þeirra í því ljósi, en lögðu málið að öðru leyti í dóm.

Miðað við orð dómara má gera ráð fyrir dómur falli í málinu á innan við tveimur vikum. Yngri bróðirinn situr enn í gæsluvarðhaldi frá því í ágúst vegna málsins á grundvelli almannahagsmuna.