Betra að skrifa undir en fá á sig lög

„Við náðum góðu spjalli en ég var með 150 manna fund,“ segir Kon­ráð Þor­steinn Al­freðsson, vara­formaður Sjó­manna­sam­bands Íslands, í samtali við mbl.is. Hann kynnti kjarasamning sjómanna á fundi hjá Sjómannafélagi Eyjafjarðar í Hofi nú síðdegis.

Konráð kynnti mönnum efni samningsins og opnaði kjörfund, þar sem meirihluti greiddi atkvæði. Sumir vilja meiri tíma en ég er með opinn kjörfund á morgun frá 10 til 15,“ segir Konráð en sjómannafélögin halda hvert sína atkvæðagreiðslu nú eftir að skrifað var undir kjarasamning sjómanna fyrir tæpum sólarhring. Atkvæðagreiðslu lýkur á flestum stöðum um miðjan dag á morgun en talningu lýkur klukkan átta annað kvöld.

Sjómenn greiða atkvæði. Ljósmynd/Þorgeir Baldursson

„Mér fannst mjög gott hljóð í mínum mönnum. Þeir spurðu margra spurninga og spurðu ýmsir um sín hjartans mál; hvað ekki náðist sem þeim fannst að hefði átt að vera þarna. Þegar upp er staðið met ég það þannig að það hafi verið mikill meirihluti sem var ánægður og feginn að það væri kominn samningur og myndu vinna næstu rúmlega tvö ár með kjarasamning sem þeir hefðu skrifað undir en ekki fengið á sig lög,“ segir Konráð en hann segir það umtalsvert betri tilfinningu að skrifa undir samning heldur en að fá sett á sig lög.

„Tilfinningin að vera með lög á sér er slæm. Ég hef upplifað það og það er slæmt,“ segir Konráð. Að hans mati voru fundargestir ekki reiðir þó að einn hafi tekið skemmtilega til orða við hann.

„Alls ekki. Það er einn sem sagði „mig langar til að flengja þig“ en ég veit ekki af hverju hann sagði það. Við hlógum að þessu og hann sagðist þurfa meiri tíma. Þetta er fínt, menn eiga að ræða málin og hugsa.“

• 1 blogg um fréttina

Bloggað um fréttina

• Jóhannes Ragnarsson: Konráð Þorsteinn Már sjóliðsforingi frá Hríseyjum