Mikill munur á verði rauðra epla

Mestur verðmunur í nýrri verðkönnun ASÍ hjá matvöruverslunum reyndist 177%. Var það á kílóverði af rauðum eplum, en þau voru ódýrust í Bónus þar sem þau kostuðu 198 krónur á kíló á meðan sama magn kostaði 549 krónur í Iceland. Á heildina litið var verðmunurinn í könnuninni mestur í flokki ávaxta.

Þá var einnig talsverður munur á frosnum heilum kjúklingi eða 135% þegar skoðað var lægsta kílóverð í hverri verslun fyrir sig. Hæsta verðið var í Krónunni úti á Granda 935 kr./kg en lægst var verðið í Bónus Holtagörðum 398 kr./kg en meðalverðið var 681 kr./kg. Minnsti verðmunurinn í könnuninni var 11% á stórri dós af bláberjaskyri frá Skyr.is. Hæsta verð var 399 kr. í Iceland Engihjalla en lægsta verðið í Bónus Holtagörðum og í Krónunni Granda 359 kr. en meðalverðið var 373 krónur.

Bónus Holtagörðum átti til 56 af þeim 63 vörum sem voru kannaðar og var í 34 tilfellum með lægsta verðið. Iceland í Engihjalla átti mest úrval vöru, 61 af 63 vörum sem skoðaðar voru, en í 33 tilfellum var Iceland með hæsta vöruverðið í þessari könnun.

Í könnuninni var skráð niður hilluverð vöru eða það verð sem neytandinn hefur upplýsingar um inni í búðinni að hann eigi að greiða fyrir vöruna. Þegar skýrt er gefið til kynna að veittur sé afsláttur af merktu verði við kassa var skráð afsláttarverð.

• Blogga um frétt