„Þetta er ógeðslega gaman“

„Það er búið að ganga vonum framar. Húsið er búið að vera stappað og það hefur verið mikið fjör,“ segir Jón Viðar Arnþórsson, bardagakappi og formaður Mjölnis, í samtali við mbl.is. Mjölnir flutti starfsemi sína í dag formlega úr Vesturbænum í nýtt hús­næði í Öskju­hlíðinni þar sem Keilu­höll­in var áður til húsa.

Nýja húsnæðið ku vera stærsta æf­inga­hús­næði í Evr­ópu sem hýs­ir MMA-bar­dag­aíþrótt­ina. Flutningurinn hefur legið fyrir í langan tíma enda húsnæði félagsins í Vesturbænum orðið of lítið fyrir allt það starf sem fer fram hjá félaginu.

„Ég vissi að fólk væri spennt en ekki svona spennt. Þetta er ógeðslega gaman,“ segir hæstánægður Jón Viðar.

Hann segir að aðstaðan sé mun betri og nýja æfingahúsnæðið er mun stærra. Æfingaaðstan á Seljavegi var 1.500 fermetrar en er 3.000 fermetrar í Öskjuhlíð. „Það er gott að hafa Öskjuhlíðina hérna og hún verður mikið notuð við útiæfingar,“ bendir Jón Viðar á og segir að það sé líka mikill kostur að vera meira miðsvæðis á höfuðborgarsvæðinu.

Spurður hver ástæðan fyrir því sé að iðkendur í Mjölni virðast flestir ánægðir segir Jón Viðar að stemningin sé gríðarlega góð. „Það er svo góð stemning og um leið og þú ert kominn í Mjölni ertu kominn í fjölskyldu. Það er tekið vel á móti þér og þú ert knúsaður og laminn til skiptis og allir eru góðir vinir,“ segir Jón Viðar en Mjölnisfólk ætlar að enda opnunardaginn á stóru teiti í kvöld.