Um 100.000 manns eiga á hættu að deyja úr hungri í Suður-Súdan og er um milljón manna til viðbótar í bráðri lífshættu, en síðastliðinn mánudag var hungursneyð formlega lýst yfir í ríkinu.
Seinast var lýst yfir slíku neyðarástandi innan landamæra Sómalíu árið 2011, að því er fram kemur í fréttaskýringu um hungursneyðina í Suður-Súdan í Morgunblaðinu í dag.
SOS Barnaþorpin á Íslandi hafa ákveðið að senda 35 milljónir króna til neyðarverkefna í sex ríkjum, þau eru Suður-Súdan; Írak; Mið-Afríkulýðveldið; Ekvador; Nígería og Níger. Alls fara fimm milljónir króna til hvers ríkis að Írak undanskildu, en þangað renna tíu milljónir.