Icelandair hefur á síðustu vikum bætt við sig tveimur farþegaþotum af gerðinni Boeing 767-300 en félagið átti fyrir tvær þotur sömu gerðar.
Guðjón Arngrímsson, upplýsingafulltrúi Icelandair, segir þriðju breiðþotu félagsins, sem ber einkennisstafina TF-ISP, hafa komið hingað til lands fyrr á þessu ári, en fjórða vélin, TF-ISW, lenti á Keflavíkurflugvelli um nýliðna helgi.
„Breiðþoturnar komu til félagsins í vetur og hafa síðan þá verið endurnýjaðar að utan og innan samkvæmt stöðlum og útlitskröfum Icelandair,“ segir Guðjón í samtali við blaðið, en breytingarnar voru unnar í viðhaldsstöð félagsins á Keflavíkurflugvelli og í Xiamen í suðausturhluta Kína.