Tónlistarkonan Hildur Kristín Stefánsdóttir afþakkaði boð um að mæta í útvarpsþáttinn Harmageddon á útvarpsstöðinni X977 í morgun. Henni var boðið þangað en Frosti Logason, annar stjórnanda þáttarins, hefur verið harðlega gagnrýndur um helgina fyrir ummæli sem hann lét falla um konur í tónlistarbransanum í umræðu um íslensku tónlistarverðlaunin.
„Hef ekkert við Frosta að segja umfram pistilinn minn, nenni ekki að heyra hann hrútskýra fyrir mér hvernig upplifun mín sé röng né gefa þeim himinháar hlustunartölur,“ segir Hildur meðal annars á Twitter.
„Eina sem ég hefði áhuga á er ef hann hefði boðið mér afsökunarbeiðni í beinni útsendingu, þá hefði ég mætt,“ bætir Hildur við.
Eitt hérna og getum við svo farið að tala um eitthvað skemmtilegt? pic.twitter.com/xhgI7yt1Kc
— Hildur (@hihildur) March 6, 2017
Hildur hlaut verðlaun fyrir popplag ársins á Íslensku tónlistarverðlaunum síðastliðið fimmtudagskvöld og gagnrýndi Frosti það að Hildur hafi hlotið verðlaunin í þætti sínum síðastliðinn föstudag.
„Á föstudagsmorgni ákveður Frosti Logason í Harmageddon á X977 að gjörsamlega undirstrika mikilvægi þess sem ég sagði í ræðunni [á Íslensku tónlistarverðlaununum] með því að láta frá sér ótrúlega niðrandi orðræðu þar sem að hann segir að dómnefnd hafi í PC-væðingu sinni gefið mér þessi verðlaun í meðaumkun fyrir að vera kona, að ég eigi þetta ekki skilið út frá spilunartölum, rakkar niður laga- og textasmíðina og segir svo að eina góða sé pródúseringin og að ég hafi örugglega fengið strák til að hjálpa mér við hana,“ skrifaði Hildur í færslu á Facebook.