Í kjölfar kaupa skattrannsóknarstjóra á gögnum um eignir Íslendinga á aflandssvæðum voru 34 mál tekin til rannsóknar. Undandreginn skattstofn í málunum er allt frá því að vera í milljónum talið upp í hundruð milljóna, en flest málanna lúta að tugum milljóna.
Rannsókn er lokið í þremur málanna og hefur tveimur þeirra verið vísað til héraðssaksóknara. Rannsókn fjögurra mála er á lokastigi og rannsókn 22 annarra mála er í gangi. Rannsókn á fimm málum hefur hins vegar verið felld niður. Þetta kemur fram í skriflegu svari Bryndísar Kristjánsdóttur skattrannsóknarstjóra við fyrirspurn mbl.is.
Til viðbótar við málin 34 voru önnur mál sem komu fram í gögnunum sem annaðhvort voru í rannsókn á þeim tíma eða höfðu verið í rannsókn.
Í nóvember var greint frá því að samtals hefðu fjörutíu og sex mál sem varða stórfelld skattalagabrot verið send til saksóknara eftir rannsóknir skattrannsóknarstjóra á gögnum aflandsfélaga. Í febrúar var greint frá því að fimm málanna hefðu farið til héraðssaksóknara. Af þeim eru tvö mál sem komu til vegna kaupa skattrannsóknarstjóra á umræddum gögnum.
Voru gögnin keypt árið 2015 fyrir 37 milljónir króna, en þau koma frá útibúi HSBC-bankans í Sviss. Lak fyrrverandi starfsmaður bankans gögnunum.