Ekki hefur enn verið ákveðið hvort lögreglumaðurinn, sem ákærður hefur verið vegna gruns um að hafa beitt mann í varðhaldi ofbeldi, verði á leystur frá störfum. Þetta segir Jón H.B. Snorrason, aðstoðarlögreglustjóri í lögreglunni á höfuðborgarsvæðinu. „Það verður ákveðið í dag,“ segir hann.
Vísir greindi frá því í gær að lögreglumaðurinn hefði verið ákærður af héraðssaksóknara vegna gruns um að hafa beitt mann, sem var í haldi lögreglu, ofbeldi.
Jón segir að lögum samkvæmt þá fari embætti héraðssaksóknara með rannsókn málsins, en málið barst embættinu í maí í á síðasta ári. „Kæran barst til héraðssaksóknara eins og vera ber,“ segir hann.
Jón segir lögreglu því ekki hafa lagt neitt mat á málið þar til nú. En samkvæmt yfirlýsingu frá lögreglu kom til álita í janúar síðastliðnum hvort senda ætti lögreglumanninn í tímabundið leyfi vegna málsins. Það hafi þá verið lögfræðilegt mat að það væri ekki fært þar sem of langur tími væri liðinn frá því að atvikið átti sér stað.
„Við erum ekkert að rannsaka þetta mál samhliða héraðssaksóknara,“ segir Jón. „Við erum ekki að leggja neitt mat á þetta mál sem er til meðferðar annars staðar, en síðan þegar þetta hlutlausa ákæruvaldsembætti, héraðssaksóknari í þessu tilfelli, gefur út ákæruna þá er komin niðurstaða og mat sem við hljótum að taka til skoðunar og það gerum við í dag.“
Að sögn Jóns þá er hinn ákærði fullgildur lögreglumaður með fasta stöðu, en mbl.is greindi frá því í gær að maðurinn starfaði í miðlægri rannsóknardeild lögreglunnar.