Íslenski Cadillac-klúbburinn var stofnaður í tengslum við ökuferð nokkurra Íslendinga í gömlum Cadillac um Bandaríkin 2006 og sama ár var hann samþykktur sem undirklúbbur í bandaríska klúbbnum the Cadillac & LaSalle Club Inc. Þetta hefur verið óformlegur klúbbur en hann fékk kennitölu fyrir skömmu og í kjölfarið verða hlutirnir formlegri en hingað til.
Cadillac-bílar, oft gamlir forstjórabílar, hafa verið áberandi í Reykjavík á ákveðnum stundum eins og á Blúsdeginum, Blúshátíðinni og Menningarnótt, en færri vita að félagar í Íslenska Cadillac-klúbbnum eiga sér sinn samastað í Faxafeni, þar sem þeir geyma bíla sína á veturna, dytta að þeim, koma saman á þriðjudagskvöldum og bjóða stundum upp á dagskrá, þar sem blúsinn er fyrirferðarmestur.
„Við blöndum saman þessum gömlu bílum, rokki og blús,“ segir Jóhann Vilhjálmsson, formaður félagsins frá 2009, en áður stjórnaði Ólafur Gunnarsson rithöfundur félaginu. „Við köllum Óla The Godfather og hann og Einar Kárason koma stundum og lesa upp úr bókum sínum.“
Þegar komið er inn í kjallarann blasa við umferðarskilti og bílnúmer, stór Coca-Cola fáni og Pizza 67 skilti. „Hérna þrífum við bílana og bónum,“ segir Jóhann eða Jói byssusmiður eins og hann er gjarnan nefndur. Hann er mikill áhugamaður um Cadillac-bíla og á núna þrjá slíka.
Fremst í salnum er upphækkað svið, þar sem tónlistarmenn taka lagið. „Á 10 ára afmæli félagsins spiluðu Vinir Dóra hérna og ári síðar kom Rúnar Þór með Klettana og Bjöggi Gísla,“ rifjar Jói upp.
Á veggjum eru veggspjöld frá Blúshátíðum, en Jói er í stjórn Blúsfélags Reykjavíkur. Klúbbfélagar hafa gjarnan tekið þátt í opnum Blúshátíðarinnar og þátttakendur í henni hafa stigið á svið í kjallaranum. „Karen Lovely söng hjá okkur í fyrra og spilaði með Blue Ice-bandinu. Hún er góður vinur okkar og kynnti viðburðinn á heimasíðu sinni.“
Blúshátíð í Reykjavík verður 8.-13. apríl. „Þá keyrum við erlendu tónlistarmennina um á Kadilökkum,“ segir Jói. „Á Blúsdeginum er spilaður blús á hverju horni á Skólavörðustíg og við ásamt Krúserklúbbnum verðum áberandi á bílunum sem fyrr, þegar dagurinn verður næst haldinn 8. apríl.“
Um 20 bílar, sem allir eiga sína sögu, eru í kjallaranum. „Við verðum að sníða okkur stakk eftir vexti, þetta er of dýrt fyrir okkur og við erum að leita að nýju og minna húsnæði,“ segir Jói, en félagar og aðrir gestir koma næst saman í „félagsheimilinu“ í kvöld og væntanlega verða blúsarar á sviðinu.