Forseti Íslands Guðni Th. Jóhannesson og Eliza Jean Reid forsetafrú hófu opinbera heimsókn sína til Noregs í konungshöllinni í Osló í dag. Heimsóknin stendur yfir fram á fimmtudag og er Guðlaugur Þór Þórðarson utanríkisráðherra með í för ásamt opinberri sendinefnd sem í eru fulltrúar fræðasamfélags og viðskiptalífs auk embættismanna frá utanríkisráðuneyti og embætti forseta.
Samkvæmt tilkynningu frá skrifstofu forseta mun Guðni m.a. leggja blómsveig að þjóðarminnismerkinu við Akershus-virkið, heimsækja norska Stórþingið og flytja lokafyrirlestur á ráðstefnunni Global Challenges – Nordic Experiences við háskólann í Osló. Eliza mun jafnframt flytja fyrirlestur um jafnréttismál og taka þátt í pallborðsumræðum.
Í kvöld stendur síðan til að forsetahjónin sitji hátíðarkvöldverð norsku konungshjónanna.