Innlent | mbl | 22.3.2017 | 22:00 | Uppfært 23.3.2017 10:21

Stefnt á að fluglest gangi árið 2025

Reiknað er með að farþegar sem fara um flugstöð Leifs Eiríkssonar muni nýta sér hraðlestina. mbl.is/Sigurður Bogi Sævarsson

Samningar hafa náðst við sveitarfélög á Suðurnesjum um skipulagsmál vegna fluglestarinnar sem áform eru um að muni ganga á milli Keflavíkurflugvallar og Reykjavíkur. „Við vinnum að sambærilegum samningum við sveitarfélögin á höfuðborgarsvæðinu og vonumst til að ná til lands fljótlega. Þetta er flókið mál og horfa þarf til margra þátta,“ segir Runólfur Ágústsson, framkvæmdastjóri Fluglestarinnar þróunarfélags.

Næsta skref 1,5 milljarðar króna

Á síðustu fjórum árum hafa verið lagðar um 300 milljónir króna í verkefnið. Næst verða lagðir í það 1,5 milljarðar króna sem myndu fara í skipulagsmál í samstarfi við sveitarfélögin, mat á umhverfisáhrifum og forhönnun. Dýrasti kostnaðarliðurinn yrði í jarðfræðirannsóknir sem nauðsynlegt er að fara í, að sögn Runólfs.

Gæti mögulega tengst inn Borgarlínu

Stefnt er að því að fluglestin verði komin í notkun árið 2025. Hún gæti mögulega tengst inn á Borgarlínu sem er á svæðisskipulagi sem sveitarfélögin á höfuðborgarsvæðinu samþykktu fyrir skömmu.

Verkefnið var kynnt fyrir fulltrúum Viðreisnar á fundi í Reykjavík gær og greint frá næstu skrefum.

Runólfur Ágústsson, framkvæmdastjóri Fluglestarinnar þróunarfélags mbl.is/Ófeigur

Fjárfesting upp á 100 milljarða króna

Verkefnið er fjármagnað af einkaaðilum og erlendum fjárfestum og er einkaframkvæmd. Engin áform eru uppi um að ríkið taki þátt í verkefninu og hefur það ekki fengið neina ríkisstyrki, að sögn Runólfs sem segir verkefnið vera arðbært. Fjárfestingin verður í heildina um 100 milljarða króna.

Stærsti einstaki hluthafinn er fyrirtækið Per Aarsleff AS sem er eitt stærsta verktakafyrirtæki Danmerkur og leiðandi í þróun og byggingu lesta.

Frétt af mbl.is

Erlendur fagfjárfestir að fluglestinni

Engin íslensk lög til um lestarsamgöngur

Margir lausir endar eru til staðar sem þarf að hnýta, til dæmis eru engin lög um lestarsamgöngur til í íslenskum lögum. Runólfur segir að stjórnvöld verði að bregðast við þessu og setja lög um slíkt. Í því samhengi bendir hann á að ákjósanlegast sé að líta til sambærilegra laga um lestarkerfi sem er í Noregi.