Allar bækur í bókaflokknum Gæsahúð hafa verið teknar úr hillum bókabúðanna Eymundsson, að ósk útgefanda. Bókaútgáfan Tindur sendi vörustjóra Eymundsson tölvupóst í morgun þar sem óskað var eftir að þær væru innkallaðar.
Alls voru í búðunum á bilinu fimm til sjö titlar í bókaflokknum en í heildina eru bækurnar í þessum flokki á þriðja tuginn og voru gefnar út á yfir 20 ára tímabili. Bókaflokkurinn var bæði fyrir eldri og yngri lesendur.
Eigandi bókaútgáfunnar Tinds er Helgi Jónsson sem jafnframt er höfundur umræddra bóka.
Ekki náðist í Helga við vinnslu fréttarinnar.
Í síðustu viku spunnust umræður meðal annars á samfélagsmiðlum um kynferðisofbeldi sem er lýst í unglingabókinni Villi vampíra, í bókaflokknum Gæsahúð fyrir eldri. Sú bók var skrifuð árið 2007 og er fyrri hluti af tveimur bókum. Seinni hlutinn nefnist Eva engill.