Stjórn HB Granda hf. ákvað síðla sumars árið 2007 að sameina alla landvinnslu félagsins á botnfiski í einu fiskiðjuveri. Taldi stjórnin ákjósanlegt að reisa til þess nýtt mannvirki á Akranesi, sem hýsa myndi alla vinnslu og nauðsynlegar frystigeymslur. Var þessi ákvörðun tekin í kjölfar niðurskurðar á aflaheimildum.

Þetta kemur fram í bréfi sem Árni Vilhjálmsson, þáverandi stjórnarformaður HB Granda, ritaði Birni Inga Hrafnssyni, þáverandi stjórnarformanni Faxaflóahafna sf., hinn 10. ágúst 2007. Fram kemur í bréfinu að frystitogarar HB Granda myndu landa afla sínum á Akranesi. Ennfremur yrðu nálega allar afurðir þaðan fluttar utan með brettaflutningaskipi, ef hagkvæmt reyndist.

Af hálfu Faxaflóahafna var því lýst yfir að fyrirtækið væri reiðubúið að hefjast handa við nauðsynlegar framkvæmdir vegna uppbyggingar HB Granda á Akranesi. Skemmst er frá því að segja að ekkert varð af flutningi HB Granda upp á Akranes í þetta sinn, að því er fram kemur í fréttaskýringu í Morgunblaðinu í dag.

Tengdar fréttir

Samdráttur í sjávarútvegi

Hagræðing í skipastól Síldarvinnslunnar

• Uppsagnir þungt högg fyrir samfélagið
• „Þarna eru mörg störf sem eru að tapast“
• 32 sagt upp störfum í Stykkishólmi
• Gagnrýni LS á starfsháttum Hafró vísað á bug

» Fleiri tengdar fréttir