„Það voru áætlanir um að koma upp öldrunargeðdeild fyrir hrun og við þurfum að dusta rykið af þeim áformum en við erum ekki enn komin svo langt,” segir Óttarr Proppé, heilbrigðisráðherra, aðspurður um aðgerðir til að bæta geðheilbrigðisþjónustu fyrir aldraða.
Hann vísar til þess að fyrir hrun voru áform um að koma öldrunargeðdeild á laggirnar árið 2006 en þær runnu út í sandinn. Eldri borgurum fjölgar jafnt og þétt og ætla má að þörfin fyrir slíka þjónustu sé ekki minni í dag en hún var fyrir rúmum áratug.
Í umfjöllum mbl.is um geðlyfjanotkun aldraðra kemur meðal annars fram að bæta þyrfti geðheilbrigðisþjónustu aldraðra til að reyna að draga úr geðlyfjanotkun þessa aldurshóps. Að mati Pálma V. Jónssonar, öldrunarlæknis þyrfti að fá sérhæfða öldrunargeðlækna til starfa til að sinna þessum aldurshópi. „Ég get tekið undir með Pálma að það þurfi að bæta sérhæfðar öldrunargeðlækningar en við þurfum að tryggja að við höfum fagfólk til að veita þjónustuna,“ segir Óttarr.
Almennt höfum við dregist aftur úr öðrum þjóðum þegar kemur að geðheilbrigðisþjónustu, að sögn Óttars. „Það virðist líklega vera ein af ástæðunum fyrir því að við notum meiri geðlyf en aðrar þjóðir. Þessi mikla geðlyfjanotkun er eitt af vandamálunum sem við stöndum frami fyrir og Embætti landlæknis er að skoða,“ segir Óttarr og tekur fram í þessu samhengi að geðlyf eru gagnleg og mikilvæg við réttar aðstæður.
Geðheilbrigðismálin eru eitt af áhersluatriðum ríkisstjórnarinnar. Unnið er eftir geðheilbrigðisstefnu og -áætlun sem var samþykkt í fyrra, að sögn Óttars.
„Við höfum verið að reyna að finna leiðir til að fylgja eftir geðheilbrigðisáætluninni eins og hún var samþykkt í fyrra og jafnvel að gera enn betur. Við erum að bæta þjónustuna í gegnum heilsugæsluna og meðal annars rmeð því flýta ráðningu sálfræðinga og auka geðheilbrigðisþjónustuna með þeim hætti,“ segir Óttarr. Sá hópur sem einkum hefur verið lögð áhersla á að þjónusta hafa verið ungt fólk og börn.
Í fjármálaáætlun ríkisstjórnarinnar eru áform um að auka fjármagn í heilbrigðismálin. „Við erum ekki komin á það stig að útfæra hvernig því fjármagni er nákvæmlega skipt milli áranna 2018 til 2022 en gert er ráð fyrir auknu fjármagni í hjúkrunar- og spítalaþjónustuna á næstu árum,“ segir Óttarr.
Eins og staðan er núna hefur viðbótarfjármagn til geðheilbrigðismála aldraðra enn ekki verið eyrnamerkt sérstaklega.
Í þessu samhengi bendir Óttarr á að huga þurfi að fjölbreyttum leiðum sem hægt er að fara til að efla lýðheilsu aldraðra og þar með geðheilsu. Læknar ávísa sífellt fleiri hreyfiseðlum fyrir fólk sem hafi reynst vel. Undanfarið hafi verið mikil þróun í þessum málaflokk sem Íslendingar verði að fylgjast vel með.