Innlent | mbl | 4.4.2017 | 16:18

Stím-málið á dagskrá í maí

Lárus Welding og Jóhannes Baldursson fyrir miðri mynd, en þeir voru báðir ákærðir í málinu. Reimar Pétursson, lögmaður Jóhannesar, er til hægri. Eggert Jóhannesson

Stím-málið verður tekið fyrir í Hæstarétti í næsta mánuði, en samkvæmt dagskrá réttarins verður það flutt 22. maí. Þrír sakborningar í málinu voru dæmdir í fangelsi í desember árið 2015, frá 18 mánuðum upp í 5 ár. Málið er eitt af hinum svokölluðu hrunmálum og tengist 20 milljarða króna láni bankans til félagsins Stím til kaupa hlutabréfa í Glitni og FL Group, en FL var á þessum tíma stærsti hluthafi Glitnis.

Frétt af mbl.is

Fjártjónshætta var veruleg

Frétt af mbl.is

Lárus Welding í 5 ára fangelsi

Í héraðsdómi var Lárus Welding, fyrrverandi bankastjóri Glitnis, dæmdur í fimm ára fangelsi fyrir umboðssvik. Jóhannes Baldursson, sem var framkvæmdastjóri markaðsviðskipta Glitnis, var dæmdur í 2 ára fangelsi í málinu, einnig fyrir umboðssvik. Þorvaldur Lúðvík Sigurjónsson, fyrrverandi bankastjóri Saga Capital, var dæmdur í 18 mánaða fangelsi fyrir hlutdeild að umboðssvikum.

Jóhannes fór í fyrra fram á að fá að leiða starfsmann héraðssaksóknara fyrir réttinn sem vitni, en vísað var til þess að símtöl milli ákærða og verjanda hans hefðu verið hleruð og hlustað á þau í þágu rannsóknar málsins. Hafi þeim ekki verið eytt jafnóðum eins og gerð sé krafa um í lögum um meðferð sakamála. Bæði héraðsdómur og Hæstiréttur höfnuðu kröfunni.

Þorvaldur Lúðvík Sigurjónsson, einn hinna ákærðu í málinu. Eggert Jóhannesson

Í dómi Héraðsdóms Reykjavíkur í málinu frá því 2015 kemur fram að Lárus hafi 16. nóvember 2007 sem forstjóri og formaður áhættunefndar Glitnis banka misnotað stöðu sína með því að fara út fyrir heimildir sínar til lánveitinga og stefna fjármunum bankans í verulega hættu þegar hann lét bankann veita FS 37 ehf. rúmlega 19,5 milljarða króna án fullnægjandi trygginga og í andstöðu við reglur stjórnar bankans og lánareglur bankans. En lánið rúmaðist ekki innan viðskiptamarka sem áhættunefnd og ákærði gátu ákveðið.

Lárus undirritaði fyrir hönd Glitnis banka lánssamning við FS 37 ehf. þar sem bankinn veitti félaginu fyrrnefnt 19.538.481.818 króna lán. „Lánið var til eins árs og veitt í þeim tilgangi að fjármagna um 78% af kaupverði FS 37 ehf. á um 4,3% hlut í Glitni banka hf. og um 4,1% hlut í FL Group hf. Hlutabréfin keypti félagið af Glitni banka hf. sjálfum með kaupsamningi dagsettum 14. nóvember 2007, alls 640.000.000 hluti í Glitni banka hf. á 25,5 krónur hvern hlut, og 380.000.000 hluti í FL Group hf. á 22,05 krónur á hvern hlut. Hlutabréfaviðskiptin námu alls 25.038.481.818 krónum. Viðskiptadagur var 13. nóvember 2007 og uppgjörsdagur 16. nóvember 2007. Af láni Glitnis banka hf. til FS 37 ehf. var 19.343.097.000 krónum ráðstafað, 19. nóvember 2007, upp í greiðslu fyrir hlutina inn á reikning FS 37 ehf. hjá Glitni banka hf,“ segir í dómnum.