Thomas Møller Olsen, grænlenskum karlmanni sem setið hefur í gæsluvarðhaldi grunaður um að hafa banað Birnu Brjánsdóttur, verður líklegast birt fyrirkall í málinu í dag eða seinasta lagi á morgun. Þetta staðfestir Kolbrún Benediktsdóttir varahéraðssaksóknari í samtali við mbl.is.
Ákæra í málinu var gefin út á fimmtudaginn í síðustu viku og fékk lögmaður mannsins þá afhenta ákæruna og gögn málsins. Kolbrún segir að sama dag hafi héraðsdómur fengið málið til sín og dómstjóri hafi svo farið yfir það. Í framhaldinu er haft samband við bæði saksóknara og verjanda og fær svo saksóknari uppgefna tímasetningu fyrir þingfestingu. Saksóknari birtir í framhaldinu ákærða fyrirkallið sem er formlegt ferli allra sakamála.
Kolbrún segir að í raun hafi þetta gengið nokkuð hratt fyrir sig og að ekkert óeðlilegt sé við tímaramma málsins.
Maðurinn var úrskurðaður í 4 vikna gæsluvarðhald í kjölfar útgáfu ákærunnar.
Birna hvarf 14. janúar. Hún sást síðast á eftirlitsmyndavél í miðborg Reykjavíkur. Sjónir lögreglu beindust fljótlega að skipverjum á grænlenska togaranum Polar Nanoq og voru tveir þeirra handteknir um borð í skipinu 17. janúar. Birna fannst látin 21. janúar. Hún var tvítug að aldri.
Öðrum manninum var sleppt úr haldi og hélt hann til Grænlands.