Í Laugardalnum eru hátt í fjögur þúsund nýjar íbúðir í burðarliðnum á næstu árum. Þetta kemur fram í drögum að húsnæðisáætlun Reykjavíkurborgar sem voru kynnt á þriðjudaginn.
Íbúðir sem eru á byggingasvæði á framkvæmdastigi eru 212 talsins. Á Bílanaustreit-Mánatúni verða 44 íbúðir og verður meðalstærð þeirra 85 fermetrar. Íbúðirnar eru allar í eigu húsnæðisfélaga.
Á Höfðatorgi I verða 94 íbúðir og þar verður meðalstærðin 95 fermetrar.
Á Suðurlandsbraut 68-70, eða í Mörkinni, verða 74 þjónustuíbúðir. Meðalstærð þeirra verður 54 fermetrar og þar verða allar íbúðirnar í eigu húsnæðisfélaga.
Íbúðir sem eru í samþykktu deiliskipulagi í Laugardalnum eru 1.362 talsins. Þar munar mest um 776 íbúðir sem eru fyrirhugaðar í Vogabyggð II. Meðalstærð þeirra verður 86 fermetrar og verður 25% þeirra í eigu húsnæðisfélaga.
Vogabyggð kallast það svæði sem afmarkast af Sæbraut, Kleppsmýrarvegi, Elliðaárósum og frárein Miklubrautar að Sæbraut.
Á Kirkjusandi eru 300 íbúðir væntanlegar. Þar verður meðalstærðin 110 fermetrar og verða 38,3% þeirra í eigu húsnæðisfélaga.
Á Blómavalsreitnum verða 110 íbúðir. Meðalstærð þeirra verður 123 fermetrar. Fjölbýlishús eru fyrirhuguð á reitnum, auk þess sem stækka á Grand Hótel. Íbúar í nærliggjandi götum hafa mótmælt uppbyggingunni.
Alls verða 100 íbúðir á Sætúnsreitnum þar sem meðalstærðin verður 100 fermetrar og á Höfðatorgi II verða 76 íbúðir af meðalstærðinni 97 fermetrar.
Þrír reitir eru í formlegu skipulagsferli. Í Vogabyggð I verða 330 íbúðir. Meðalstærð þeirra verður 100 fermetrar og eiga húsnæðisfélög 20% í þeim.
Mun fleiri íbúðir eru fyrirhugaðar í Skeifunni, eða 750 talsins. Ekkert kemur fram um meðalstærð þeirra í húsnæðisáætluninni en 25% þeirra verða í eigu húsnæðisfélaga.
Samráðs- og kynningarfundur var haldinn um Skeifuna á þriðjudaginn með hagsmunaaðilum.
Á Borgartúnsreitum eru 180 íbúðir í undirbúningi þar sem meðalstærðin verður 70 fermetrar.
Íbúðir á þróunarsvæði sem er í skoðun eða undirbúningi eru 1.025 talsins. Þar af eru 800 íbúðir fyrirhugaðar í Vogabyggð III og IV og 225 íbúðir á SS-reitnum. Ekkert kemur fram um stærð þeirra.