200 mílur | mbl | 7.4.2017 | 16:19

Engey hlaut góðar viðtökur við komuna

Kampavínsflaskan small vel í stefni skipsins. mbl.is/Eggert

Engey RE 91, nýr ísfisktogari HB Granda, kom til hafnar í Reykjavík í dag og fékk þar góðar viðtökur. Sérstök móttökuathöfn fór fram við Norðurgarð í Reykjavíkurhöfn klukkan 14.

Forstjóri HB Granda, Vilhjálmur Vilhjálmsson, bauð þar gesti velkomna áður en Bjarni Benediktsson, forsætisráðherra, og S. Björn Blöndal, formaður borgarráðs fluttu ávörp.

Þorgerður Katrín Gunnarsdóttir, sjávarútvegs- og landbúnaðarráðherra, gaf skipinu þá formlega nafn áður en Hjálmar Jónsson, Dómkirkjuprestur, gaf því blessun sína.

Karlakór Reykjavíkur söng við athöfnina.

Engey kom til landsins þann 25. janúar að lokinni fimmtán sólarhringa siglingu frá Celiktrans skipasmíðastöðinni í Istanbúl í Tyrklandi, þar sem skipið var smíðað.

Þorgerður Katrín Gunnarsdóttir, sjávarútvegsráðherra, ræðir málin við Bjarna Benediktsson, forsætisráðherra. mbl.is/Eggert

Eitt tæknivæddasta skip landsins

Frá komu skipsins til landsins hefur sjálfvirku lestarkerfi ásamt búnaði á vinnsludekk verið komið fyrir í skipinu á Akranesi, að því er fram kemur á vef HB Granda.

„Búnaðurinn, sem er sá fyrsti sinnar tegundar, hefur fyrirtækið Skaginn 3X hannað, þróað og smíðað á Akranesi og á Ísafirði. Búnaðurinn mun stórbæta vinnuumhverfi sjómanna um borð auk þess sem hann mun auka afkastagetu skipsins og hámarka virði afurða úr afla þess,“ segir í tilkynningu fyrirtækisins.

„Við erum afar ánægð og stolt að taka á móti Engey RE 91 sem er glæsilegur ísfisktogari og án efa eitt tæknivæddasta fiskiskip landsins,“ er haft eftir Vilhjálmi.

„Við munum taka á móti tveimur ísfisktogurum, Akurey og Viðey, í flotann á næstu mánuðum en þau skip verða með sama búnaðinum og er í Engey. Við reiknum með að Engey fari í sína fyrstu veiðiferð í lok apríl,“ segir hann.

Nokkur fjöldi var saman kominn við Norðurgarð í dag. mbl.is/Eggert

Hver einasti fiskur myndaður og greindur

„Um er að ræða stærsta þróunarverkefni sem ráðist hefur verið í um borð í fiskiskipi hérlendis,“ segir þá Ingólfur Árnason, framkvæmdastjóri Skagans 3X.

„Þessi nýja tækni grundvallast fyrst og fremst á nýjum aðferðum við meðhöndlun fisksins og aukinni sjálfvirkni í vinnslukerfinu sem flýtir aðgerð og frágangi á afla sem skilar mun betri gæðum,“ segir Ingólfur.

Með nýrri myndavélatækni er hver einasti fiskur myndaður, tegundagreindur og stærðarflokkaður. Myndavélatæknin heldur utan um allan feril fisksins allt þar til að löndun lokinni.

Með þessu erum við komin með möguleika á rekjanleikakerfi sem á sér enga hliðstæðu allt frá veiðum til neyslu, ef menn kjósa svo,” segir Ingólfur, en Skaginn 3X fékk á dögunum Nýsköpunarverðlaun Íslands fyrir þennan nýja búnað.

Nautic ehf. sá um hönnun skipsins. Samtals eru klefar fyrir 17 manns um borð í skipinu, 15 eins manns klefar og einn tveggja manna klefi.