Segjast þurfa að undirbúa fjöldauppsagnir

Ný reglugerð, sem heimilar handhöfum aflaheimilda að hliðra 30 prósentum veiðiheimilda milli ára, ógnar starfsgrundvelli sjálfstæðra framleiðenda og neyðir þá til að hefja undirbúning að fjöldauppsögnum starfsfólks. Þetta segir í tilkynningu frá Samtökum fiskframleiðenda og útflytjenda.

Er reglugerðinni mótmælt harðlega og hún sögð kippa fótunum undan rekstrargrundvelli sjálfstæðra fiskframleiðenda. Við blasi að segja verði upp hundruðum starfsmanna víðs vegar um landið.

Fram kemur þá að samtökin telji reglugerðina ganga gegn 1. grein laga um fiskveiðistjórnun, en þar segir eftirfarandi:

„Nytjastofnar á Íslandsmiðum eru sameign íslensku þjóðarinnar. Markmið laga þessara er að stuðla að verndun og hagkvæmri nýtingu þeirra og tryggja með því trausta atvinnu og byggð í landinu. Úthlutun veiðiheimilda samkvæmt lögum þessum myndar ekki eignarrétt eða óafturkallanlegt forræði einstakra aðila yfir veiðiheimildum.“

Segir svo um þetta í tilkynningunni:

„Hliðrunin milli ára dregur verulega úr því magni sem kemur inn á fiskmarkaði og vinnur þannig beinlínis gegn því að sameiginleg auðlind þjóðarinnar sé nýtt í þágu þjóðarinnar allrar. Þessi reglugerð er í þágu handhafa aflaheimilda og ekki annarra. Hún gengur gegn hagsmunum sjálfstæðra framleiðenda, fiskvinnslufólks, neytenda og þjóðarbúsins alls.“

Hin óslitna virðiskeðja er sögð blekking ein. mbl.is/Sigurður Bogi

Reglugerðin verði dregin til baka

Í framhaldi er tilkynningin svo hljóðandi:

„Mikil eftirspurn er eftir íslenskum fiski á erlendum mörkuðum og anna sjálfstæðir framleiðendur ekki eftirspurn. Helstu rök fyrir hinni óslitnu virðiskeðju í íslenskum sjávarútvegi, þar sem sami aðili heldur á aflaheimildum, veiðir fiskinn, vinnur hann og selur á erlendum mörkuðum, hafa verið það að einungis hin óslitna virðiskeðja tryggi afhendingaröryggi og góða þjónustu við kröfuharða erlenda markaði.

30% hliðrun á aflaheimildum milli ára á sama tíma og skortur á íslenskum fiski á fiskmörkuðum innanlands og á erlendum mörkuðum sýnir svart á hvítu að hin óslitna virðiskeðja er blekking ein og sérhagsmunapot en ekki í þágu þjóðarinnar.

Í 10 vikna sjómannaverkfalli héldu nokkur fyrirtæki sjálfstæðra fiskframleiðenda úti þjónustu við mikilvæga ferskfiskmarkaði og skiluðu háu verði til sjómanna og til þjóðarbúsins í heild. Þá var lítið gagn í hinni óslitnu virðiskeðju. Þrátt fyrir þetta á nú enn að skerða framboð til sjálfstæða fiskframleiðenda með þessari aðgerð.

Sífellt kemur betur í ljós hvernig handhafar aflaheimilda hugsa eingöngu um sína sér hagsmuni og greiða sér háar arðgreiðslur en skilja starfsfólk og heilu byggðarlögin eftir í stórum vanda og atvinnuleysi þegar það hentar. Ráðamenn þjóðarinnar verða að vakna til vitundar í þessum efnum.

Nær væri að stjórnvöld kölluðu eftir samfélagsábyrgð kvótahafa í stað þess að sveigja kerfið til að gera þeim kleift að soga til sín allan arð af sameiginlegri þjóðarauðlind á kostnað sjómanna, samkeppnisaðila í greininni og verkafólks í landvinnslu.

Hin nýja reglugerð grefur undan því að hægt sé að ná sátt um þessa grundvallaratvinnugrein þjóðarinnar. Aðildarfyrirtæki SFÚ krefjast þess að hún verði dregin til baka en verði það ekki gert neyðast þau til að hefja þegar í stað undirbúning uppsagna starfsfólks í hundraða tali.“

• 1 blogg um fréttina

Bloggað um fréttina

• Eyjólfur Jónsson: Er ekki kominn tími á ykkur Strákar! Þetta gengur ekki …