Thomas Møller Olsen, sem grunaður er um að hafa banað Birnu Brjánsdóttur, segist saklaus af ákæru málsins, bæði því að hafa banað Birnu og að hafa flutt inn 23 kíló af kannabisefnum. Þetta kom fram í þingfestingu málsins í Héraðsdómi Reykjaness í dag.
Í ákæru málsins kemur fram að hann hafi veist að Birnu með ofbeldi. Er hann sagður hafa slegið hana ítrekað í andlit og höfuð, „tekið hana kverkataki og hert kröftuglega að hálsi hennar.“
Þegar dómari spurði Olsen um afstöðu hans varðandi ákæruliðina sagðist hann saklaus af bæði morðákærunni og fíkniefnainnflutningi. Sagðist hann mótmæla bótakröfu forelda Birnu með vísan til afstöðu sinnar til sakagifta.
Þegar Olsen gekk inn í dómsalinn huldi hann andlit sitt með yfirhöfn, en eftir að salnum var lokað, ljósmyndarar farnir og dómari kominn inn í salinn tók hann niður yfirhöfnina.
Öll samskipti sem tengdust ákærða eru þýdd af dómtúlki, en slíkt lengir þinghaldið sem að öðru leyti fer fram á íslensku eins og lög kveða á um.
Verjandi Olsen óskaði eftir tíma til að fara yfir gögn málsins og var þinghaldi frestað til 25. apríl. Skilaði saksóknari málsins meðal annars inn geðheilbrigðisvottorði og viðbótargöngnum vegna notkunar síma sem er meðal gagna málsins.
Atburðurinn á að hafa átt sér stað annaðhvort þegar rauðu Kia Rio-bifreiðinni var lagt í nágrenni flotkvíarinnar við Hafnarfjarðarhöfn, eða á öðrum óþekktum stað.
Að því loknu á Olsen að hafa varpað Birnu í sjó eða vatn þar sem hún drukknaði.
Lík Birnu fannst í fjörunni neðan við Selvogsvita 22. janúar eftir umfangsmikla leit björgunarsveita og hafði hennar þá verið saknað í rúma viku.
Olsen er einnig ákærður fyrir stórfellt fíkniefnalagabrot, en hann á að hafa reynt að smygla rúmlega 23 kg af kannabisefnum, sem hann hafði komið fyrir í káetu sinni um borð í grænlenska togaranum Polar Nanoq.
Í ákærunni er einnig lögð fram einkaréttarkrafa af hendi foreldra Birnu og hljómar hún upp á 10,5 milljónir kr. í miskabætur fyrir hvort þeirra.