Umhverfisstofnun hefur ekki tekið neinar ákvarðanir um að loka kísilmálmverksmiðju United Silicon í Helguvík en mál fyrirtækisins eru hins vegar til skoðunar hjá stofnuninni. Tekin verður ákvörðun um framhaldið þegar þeirri athugun er lokið. Þetta segir Sigrún Ágústsdóttir, sviðsstjóri hjá Umhverfisstofnun, í samtali við mbl.is.

Ýmis vandamál hafa plagað rekstur kísilmálmverksmiðjunnar undanfarna mánuði. Einkum tengd mengun frá fyrirtækinu. Eldsvoði kom síðan upp í verksmiðjunni í nótt en í kjölfar þess lýsti Björt Ólafsdóttir umhverfisráðherra yfir þeirri skoðun sinni að loka ætti verksmiðjunni á meðan það sem áfátt væri í rekstrinum væri lagað. Ráðherra hefur þó ekki valdið til þess að loka verksmiðjunni heldur Umhverfisstofnun. 

Vinna var í gangi hjá Umhverfisstofnun vegna kísilmálmverksmiðjunnar í aðdraganda páskanna og yfir þá vegna lyktaráhrifa sem talin eru koma frá verksmiðjunni. Meðal annars voru fyrirtækinu send tvö bréf vegna þess. Ákveðið var á skírdag að ef óundirbúið ofnstopp, sem varaði í klukkustund eða lengur, ætti sér stað myndi United Silicon ekki ræsa ofninn aftur, alla vega ekki á meðan norðlægar áttir væru ríkjandi.

Sigrún segir að þrátt fyrir þær aðgerðir sem gripið hafi verið til á skírdag hafi stofnuninni borist kvartanir á páskadag. Fyrir vikið var farið í eftirlitsferð í gær á annan í páskum og verið er að vinna úr niðurstöðum þess eftirlits í dag. Síðan hafi eldsvoðinn í nótt komið upp og hafi í kjölfarið verið kallað eftir upplýsingum um hann. Þegar þær upplýsingar liggja fyrir verður unnið úr þeim og síðan tekin ákvörðun um framhaldið í kjölfar þess.

Tengdar fréttir

Kísilverksmiðja United Silicon í Helguvík

Óttast að kröfur fyrnist vegna seinagangs í rannsókn

• Dæmt til að borga 217 milljóna lán
• Arion segir þrjá kosti í stöðunni
• PCC skoðar kaup á kísilverksmiðjunni í Helguvík
• Gjaldþrotið byggir á 1,8 milljarða kröfu

» Fleiri tengdar fréttir

• Blogga um frétt