Friðfinnur Hermannsson viðskiptafræðingur lést á líknardeild Landspítalans síðastliðinn mánudag, 53 ára að aldri.
Friðfinnur fæddist í Reykjavík 4. júní 1963, sonur Guðríðar S. Friðfinnsdóttur og Hermanns Árnasonar. Hann varð stúdent frá Menntaskólanum á Akureyri 1983 og lauk prófi í viðskiptafræði við Háskóla Íslands árið 1989. Þá stundaði hann frönskunám í Lyon í Frakklandi veturinn 1989-90.
Friðfinnur gengdi ýmsum störfum í atvinnulífinu, m.a. á Akureyri, en lengst starfaði hann sem framkvæmdastjóri Heilbrigðisstofnunar Þingeyinga á Húsavík. Síðustu árin var hann stjórnunarráðgjafi hjá ráðgjafarfyrirtækinu Nolta en hann var einn stofnenda og eigenda þess fyrirtækis. Hann vann með stjórnendum í nánast öllum atvinnugreinum við stefnumótun, liðsheild og umbótastarf.
Friðfinnur starfaði að félagsmálum. Sat m.a. í menningarmálanefnd Húsavíkur og stjórn Knattspyrnufélags Akureyrar. Hann lék með meistaraflokki KA í knattspyrnu um nokkurra ára skeið, þar af 55 leiki í úrvalsdeildinni.
Eiginkona Friðfinns, Berglind Svavarsdóttir, lifir mann sinn ásamt þremur börnum þeirra.
Útför Friðfinns verður gerð frá Lindakirkju í Kópavogi föstudaginn 28. apríl nk. klukkan 13.