Hæstiréttur staðfesti dag áframhaldandi gæsluvarðhaldsúrskurð yfir karlmanni sem ákærður var í mars í fyrra fyrir frelsissviptingu, líkamsárás, hótanir, kynferðisbrot og stórfelldar ærumeiðingar gegn sambýliskonu sinni. Maðurinn var einnig talinn hafa reynt að hafa áhrif á framburð konunnar.
Maðurinn var í júní í fyrra dæmdur í tveggja og hálfs árs fangelsi í héraðsdómi, en málinu var svo áfrýjað af hálfu ákæruvaldsins og var það flutt í Hæstarétti og er nú beðið dóms. Brotin sem maðurinn hefur nú verið sakfelldur fyrir geta varðað allt að 16 ára fangelsi.
Héraðsdómur úrskurðaði fyrr í mánuðinum að manninum yrði áfram gert að sæta gæsluvarðhaldi á meðan mál hans er til meðferðar fyrir Hæstarétti Íslands, en þó eigi lengur en til 17. júlí.
Í ákæru gegn manninum kemur fram að hann hafi svipt sambýliskonu sína frelsi í fjórar klukkustundir á heimili þeirra og ítrekað veist að henni, slegið hana hnefahöggum og rifið í hár hennar. Þá hafi hann skipað konunni að setjast á stól en svo sparkað honum undan henni svo hún féll á gólfið.
Meðan á þessu stóð er maðurinn sagður hafa hótað konunni ítrekað lífláti og meinað útgöngu af heimilinu.
Maðurinn á einnig að hafa tekið myndir af kynfærum konunnar og áreitt hana kynferðislega, auk þess sem hann þvingaði hana bæði til munnmaka og endaþarmsmaka.
Við rannsókn málsins kom enn fremur fram að maðurinn og faðir hans reyndu ítrekað að hafa áhrif á framburð konunnar með því að setja sig í samband við hana.