Landsnet hefur ákveðið að nýtt umhverfismat verði gert fyrir Blöndulínu 3. Markmiðið með nýju umhverfismati er m.a. að skapa sátt um þau ferli sem tengjast uppbyggingu Blöndulínu 3. Ákvörðunin var tekin í samráði við Skipulagsstofnun. 

Þetta kemur fram í tilkynningu frá Landsneti.

Þar segir, að Blöndulína 3 hafi þegar verið tekin af framkvæmdaráætlun næstu þriggja ára til þess að tryggja nægan tíma til að undirbúa og framkvæma nýtt umhverfismat. Það hafi verið gert með því að breyta forgangsröðun framkvæmda við styrkingu meginflutningskerfisins á Norðurlandi í kerfisáætlun Landsnets 2016-2025 sem send hefur verið til Orkustofnunar til samþykktar.

„Við höfum verið að innleiða breytt vinnulag sem miðar að því að ná verkefnum upp úr þeim átakafarvegi sem þau hafa verið í. Liður í því er stofnun verkefnaráða og hagsmunaráða sem tryggja öllum hagsmunaaðilum aðkomu. Þannig viljum við tryggja virkt samtal, gagnkvæman skilning og betra upplýsingaflæði í aðdraganda ákvarðana um framkvæmdir,“ segir Guðmundur Ingi Ásmundsson, forstjóri Landsnets, í tilkynningu.  

„Með því að taka Blöndulínu 3 af framkvæmdaáætlun næstu þriggja ára sköpum við nægilegt svigrúm til þess að undirbúa nýja og vandaða málsmeðferð við mat á umhverfisáhrifum framkvæmdarinnar í samræmi við okkar breyttu áherslur,“ segir hann ennfremur.

Tengdar fréttir

Rammaáætlun

Saknar aðkomu þjóðarinnar

• Smíða þyrfti rammaáætlun um stjórnmálamenn
• „Þetta er vandamál okkar allra“
• Beint: Málstofa um framtíð rammaáætlunar
• Stýrihópur endurskoðar lög um rammaáætlun

» Fleiri tengdar fréttir

• Blogga um frétt