Starfsmenn skemmtistaðar í austurhluta Reykjavíkur óskuðu eftir aðstoð lögreglu á þriðja tímanum í nótt vegna ofurölvi konu. Þegar lögregla kom á vettvang var hún búin að bíta dyravörð og var algjörlega óviðráðanleg að sögn lögreglu. Hún var handtekin og flutt á lögreglustöðina á Hverfisgötu þar sem hún gistir fangageymslur lögreglunnar.
Skömmu fyrir miðnætti stöðvaði lögreglan bifreið við hefðbundið umferðareftirlit í Breiðholti. Við athugun fannst talsvert magn af áfengi, bæði sterkt vín og bjór í bifreiðinni og talsvert af peningum.
Ökumaðurinn var handtekinn og fluttur á lögreglustöðina við Dalveg þar sem tekin var af honum skýrsla vegna málsins. Hann var síðan látinn laus en hald lagt á áfengið og peningana.
Átta ökumenn voru teknir grunaðir um ölvun eða fíkniefnaneyslu á höfuðborgarsvæðinu á nokkrum klukkutímum í nótt. Einn þeirra, sem er grunaður um akstur undir áhrifum fíkniefna, er sviptur ökuréttindum og eins var hann með fíkniefni á sér.
Fimm af ökumönnunum eru grunaðir um akstur undir áhrifum fíkniefna en þrír um ölvun.