Enginn blaðamaður Fréttatímans hefur fengið greidd laun fyrir aprílmánuð. Útgáfufélag Fréttatímans, Morgundagur, er ekki enn komið í gjaldþrot, þrátt fyrir að ákvörðun um slíkt hafi verið tekin.
Fimm blaðamenn fengu ekki greitt fyrir marsmánuð. Þeir blaðamenn sem þess óskuðu framseldu kröfur sínar til félagsins og gátu þá fengið lán frá félaginu að því marki sem krafan er tryggð í ábyrgðarsjóði í launa.
„Það er algjörlega óviðunandi að fólk standi uppi launalaust allt í einu og fái ekki greidd laun sem það á lögmæta kröfu á,“ segir Hjálmar Jónsson, formaður Blaðamannafélags Íslands, í samtali við mbl.is.
Hjálmar bendir á að Ábyrgðarsjóður launa tryggir ekki laun fólks nema að takmörkuðu leyti. Laun upp að 385 þúsund krónum á mánuði eru tryggð hjá sjóðnum. „Nánast allir eru á verulega hærri launum og fyrirsjáanlegt tap þeirra er umtalsvert,“ segir Hjálmar.
Síðasta tölublað Fréttatímans kom út 7. apríl. Þá hafði hluti starfsmanna ekki enn fengið greidd laun fyrir marsmánuð. Gunnar Smári Egilsson, einn stærsti eigandinn, útgefandi og annar ritstjóri blaðsins, hafði þá stigið til hliðar og hætt afskiptum af útgáfunni.