Lögreglueftirlit í Langholtshverfi og á svæðinu í kringum Laugardal hefur verið hert gríðarlega mikið síðustu daga og verður því haldið áfram. Ófremdarástand hefur verið í hverfinu síðustu vikur og mánuði þar sem hópur barna og unglinga hefur ítrekað gengið berserksgang, valdið töluverðu eignatjóni og jafnvel ráðist á jafnaldra sína.
Lögreglu hefur ekki borist kæra frá 14 ára dreng sem ráðist var á af hópi unglinga í hverfinu síðustu helgi eins og greint var frá á mbl.is.
Í samtali við mbl.is segir Guðmundur Páll Jónsson, fulltrúi hjá lögreglunni á höfuðborgarsvæðinu að búið sé að auka eftirlit í hverfinu. „Við vorum með nokkra einkennisklædda lögreglumenn í hverfinu í gær á reiðhjólum sem höfðu afskipti af nokkrum unglingum. Til að mynda voru nokkrir tveir og þrír á vespum sem má náttúrulega ekki,“ segir Guðmundur og bætir við að einnig hafi lögreglumennirnir haft afskipti af hópamyndun unglinga í hverfinu.
Ekkert hafi verið um skemmdarverk eins og síðustu vikur og segir hann að eflaust spili þetta aukna eftirlit inn í með það. „Við erum náttúrulega búin að herða eftirlitið gífurlega mikið núna og ætlum að halda því áfram.“