Skip Skinneyjar-Þinganess á Hornafirði, Þinganes SF-25, er fyrsta íslenska fiskiskipið sem gengur fyrir olíu sem blönduð hefur verið með íslenskri repjuolíu. Vélar skipsins gengu ágætlega á þessari blöndu.
Tveir repjuræktendur á Suðurlandi gáfu repjuolíuna vegna rannsóknar á orkuskiptum í sjávarútvegi sem Samgöngustofa stendur fyrir, en um mál þetta er fjallað í Morgunblaðinu í dag.
Skinney-Þinganes rekur kúabú í Flatey á Mýrum og segir Hjalti Þór Vignisson, framkvæmdastjóri sölu og þróunar, að jörðin búi yfir miklum möguleikum. Hugað verði að repjuræktun í framtíðinni ásamt vinnslu hennar og nýtingu á skip útgerðarinnar.