Auk rannsókna á norsk-íslensku síldinni var magn kolmunna austur og norðaustur af landinu metið í leiðangri Árna Friðrikssonar. Þá voru gerðar umfangsmiklar mælingar til að kanna ástand hafsins og vistkerfisins, m.a. með rannsóknum á magni átustofna.
Á Íslands-Færeyjahryggnum varð vart við kolmunna, svo og í hlýsjónum suðaustur af Jan Mayen. Þéttleikinn var að öllu jöfnu lítill. Kolmunninn var blandaður að stærð en var öllu smærri norðar.
Nær ekkert varð vart við makríl í leiðangrinum, en á undanförnum árum hafa einungis fáeinir fiskar fengist í einstaka togum milli Íslands og Færeyja. Þessar niðurstöður gefa því ekki tilefni til að álykta um makrílgengd inn á íslensk hafsvæði í sumar.