Sexmenningarnir sem handteknir voru í gær, vegna hrottalegrar líkamsárásar í Mosfellsdal sem leiddi til dauða karlmanns á fertugsaldri, hafa verið úrskurðaðir í gæsluvarðhald í Héraðsdómi Reykjavíkur.
Fimm voru úrskurðaðir í 15 daga gæsluvarðhald en einn sakborninga var úrskurðaður í vikulangt gæsluvarðhald. Þetta staðfesti Jón H.B. Snorrason, aðstoðarlögreglustjóri á ákærusviði, við mbl.is.
Spurður sagði Jón að allt fólkið væri dæmt í gæsluvarðhald á grundvelli rannsóknarhagsmuna.
Árásarmennirnir eru sakaðir um að hafa látið höggin dynja á fórnarlambinu og síðar keyrt yfir fætur þess. Endurlífgun var reynd á vettvangi en án árangurs. Maðurinn var heima með konu sinni og nýfæddu barni er árásarmennina bar að garði.
Lögreglu barst tilkynning um árásina klukkan 18.24 í gærkvöldi og þá var fjölmennt lið sent á vettvang. Fimm karlar og ein kona voru handtekin. Flest hinna handteknu hafa áður komið við sögu lögreglu.