Á þessu ári munu 9-10 nýir togarar, smíðaðir í Tyrklandi og Kína, bætast í flotann, gangi áætlanir eftir. Síldarvinnslan í Neskaupstað stefnir að því að endurnýja ísfisktogaraflota sinn og láta smíða tvo stærri og tvo minni togara, að sögn Gunnþórs Ingvasonar framkvæmdastjóra. Hann vonast til þess að hægt verði að bjóða smíði fyrsta skipsins út á þessu ári. HB Grandi hefur samið um smíði nýs frystitogara á Spáni.

Hraðfrystihúsið Gunnvör (HG) hefur fengið fyrirheit um 20.000 fermetra lóð á nýja hafnarsvæðinu við Sundahöfn á Ísafirði. „Gangi allt eftir og rekstrarskilyrði verða í lagi höfum við áhuga á að byggja þar upp og flytja þangað árið 2021,“ sagði Einar Valur Kristjánsson framkvæmdastjóri. Mörg sjávarútvegsfyrirtæki hafa sameinast undir hatti HG og er fiskvinnsla félagsins á 2-3 stöðum. „Við ætlum að vera með þetta allt undir sama þaki,“ sagði Einar. Mikilvægur þáttur í uppbyggingunni er að treysta hráefnisöflunina með smíði á nýjum ísfisktogara.