Karlmaður var í gær úrskurðaður í áframhaldandi tveggja vikna gæsluvarðhald vegna gruns um tilraun til manndráps eða stórfellda líkamsárás, með því að hafa ítrekað stungið annan mann í brjóst og handlegg eftir að sá hafði gert athugasemd við reykingar mannsins í matsal skipverja á hollensku skipi.
Ævar Pálmi Pálmason lögreglufulltrúi staðfesti í samtali við mbl.is að gæsluvarðhald yfir manninum hefði verið framlengt.
Hollensk yfirvöld eru með lögsögu í málinu vegna þess að atvikið um borð í hollensku skipi og sendu framsalsbeiðni vegna þess hingað. Dómsmálaráðuneytið féllst á þá beiðni þeirra.
Manninum var kynnt niðurstaðan í gær og var hann úrskurðaður í áframhaldandi gæsluvarðhald í tvær vikur hér á landi. Maðurinn hafði sólarhring til að krefja dómsúrskurðar um skilyrði framsalsins en Ævar vissi ekki hvort hann ætlaði að gera það.
Að öllu óbreyttu bíður maðurinn fylgdar til Hollands.
Fram kemur í dómi Hæstaréttar, sem staðfestir úrskurð Héraðsdóms Reykjavíkur, að maðurinn hafi verið handtekinn þann 7. maí við komu sína til landsins, en hann er grunaður um tilraun til manndráps tveimur dögum áður þegar hann mun hafa ítrekað stungið annan mann.
Sá sem fyrir árásinni varð var fluttur með þyrlu bresku strandgæslunnar á sjúkrahús, með stungusár á brjósti og í handlegg.