Áætlað er að flug Icelandair til Kaupmannahafnar, sem átti að fara klukkan 13:00 í dag en þurfti að fresta vegna óhapps, fari ekki í loftið fyrr en klukkan 20:00 í kvöld. Farþegar um borð í vélinni þurftu að yfirgefa vélina eftir að þeir voru komnir um borð eftir að landgöngubrú rakst utan í vélina.
Guðjón Arngrímsson, upplýsingafulltrúi Icelandair, staðfesti óhappið í samtali við mbl.is fyrr í dag en rétt fyrir klukkan fjögur í dag var farþegum tilkynnt að brottför seinki til klukkan átta í kvöld, sjö klukkustundum seinna en áætlað var í upphafi.
Farþegi um borð í vélinni sagðist í samtali við mbl.is hafa heyrt að rispa hafi komið á vélina sem skoða þurfti betur og því hafi hún verið rýmd. Þá hafi farþegar sem sátu framarlega í vélinni fundið fyrir henni hristast þegar landgöngubrúin rakst utan í hana.
Ekki hafa fengist frekari upplýsingar um óhappið að svo stöddu, til að mynda hvort og þá hversu miklar skemmdir hafi orðið á vélinni eða hvort önnur vél verði send í hennar stað, en farþegar bíða nú í flugstöðinni eftir að lagt verði af stað til Kaupmannahafnar.