Söfnun WOW Cyclothon fyrir Slysavarnafélagið Landsbjörg lauk í gær en alls söfnuðust 20.425.710 krónur.
Lið CCP vann áheitakeppnina með 1.651.000 krónur en liðið vann einnig hjólreiðakeppnina í B-flokki 10 manna liða karla. Í öðru sæti áheitakeppninnar var Aero Mag sem safnaði 1.410.000 krónum en það kemur sérstaklega á óvart þar sem liðið er erlent og málefnið þeim því framandi. Í þriðja sæti hafnaði lið Opinna kerfa – Credit Info en þau söfnuðu 1.400.000 krónum.
Slysavarnafélagið Landsbjörg var stofnað 2. október árið 1999 og er landssamtök björgunarsveita og slysavarnasveita á Íslandi. Hjá þeim starfa um 18.000 sjálfboðaliðar sem halda uppi björgunar- og leitarstörfum í landinu auk þess að sinna slysavörnum á landsvísu. Undir þeirra hatti eru alls 99 björgunarsveitir, 33 slysavarna- og kvennadeildir auk 30 unglingadeilda.
Í fyrra var safnað fyrir samtökin Hjólakraft og söfnuðust þá tæpar 12 milljónir króna. Árið þar á undan söfnuðust rúmar 20 milljónir króna fyrir uppbyggingu Batamiðstöðvar á geðsviði Landspítalans á Kleppi.