Stefnt er að því að ljúka uppgreftri við Dysnes í Eyjafirði í þessari viku. Þetta segir Hildur Gestsdóttir, fornleifafræðingur hjá Fornleifastofnun Íslands.
Um mánuður er síðan víkingasverð fannst í bátskumli á svæðinu og hófst eiginlegur uppgröftur nokkrum dögum síðar. Af sex kumlum á svæðinu er búið að grafa fjögur upp og hið fimmta er langt komið.
Hildur segir síðasta kumlið komið styttra á leið og útilokar ekki að eitthvað nýtt finnist í því. Svo virðist sem þrjú kumlanna geymi mann og hest og standa vonir til að eitthvað finnist af heillegum hestabeinum í því síðasta, að því er fram kemur í Morgunblaðinu í dag.